【紅葉散策 2024】滋賀京都自駕3日遊！
去日本當返鄉下嘅香港人，對關西地區必定不陌生，京都、大阪、神戶、奈良……以上地方有咩好好食好玩，相信已經如數家珍。咁關西仲有邊度好去？
其實喺疫情之前，同京都相鄰10分鐘車程嘅滋賀已經慢慢成為新寵兒，除咗有寺院、神社、古蹟，仲有浩瀚嘅日本最大湖泊「琵琶湖」。Kilowatt 小隊為大家整理咗一個三日嘅自駕遊行程，等大家暢遊滋賀， 趁秋天睇靚景，賞紅葉！
漫遊滋賀3日2夜自駕游行程
第一日
1. 京都車站
想輕鬆遊滋賀，建議喺返京都租車，而好多人都會選擇喺京都車站租，坊間有格價網，可以一次過比較各間熱門大型租車公司嘅價錢，大家可以按照京都租車日期、取車＆還車地點、車型等相關資篩選。
2. 比叡山延曆寺
租完車，梗係出發去玩啦，第一站我哋先去比叡山延曆寺！比叡山坐落京都北面，位處京都府同滋賀縣交界，自古以來就被視為係鎮護京都嘅聖山，亦係佛教最高地。
要留意返，延曆寺並非單指一座寺院，而係約150座建築群嘅統稱，而呢度又分為三大區域，分別係東塔、西塔同橫川，合稱三塔。有住1200年悠久歷史同佛教文化特色嘅延曆寺，1994年被列入世界文化遺產，有幾值得遊覽，不然而喻。
相傳喺戰國時代，延曆寺曾因庇護織田信長嘅戰敵而被焚燬；走過沉重歷史後，延曆寺而家已成一片世外淨土。呢度有別一般寺廟或神社，訪客如果想要求籤，要去到元三大師堂，先向僧侶解釋自己煩惱，再請僧侶抽籤詩，最後由僧侶解釋籤詩上內容。
前往比叡山延曆寺的比叡山車道（比叡山Driveway）與奧比叡車道（奧比叡Driveway）皆須收費，天候不佳時會封道，請提前確認道路狀況。詳情請參考比叡山Driveway 與奧比叡Driveway 官網。冬季可能有降雪機會，請加裝雪鏈或更換雪胎。
由於比叡山車道與奧比叡車道是由兩間公司營運，所以收費模式會比較複雜。進入比叡山的車道分別有兩個收費站開始，位於南邊的「田の谷峠料金所」及 位於北邊的「仰木料金所」。
由「田の谷峠料金」所出發的建議自駕路線如下：
| 自駕路線 | 收費 |
|---|---|
| 1. 田の谷峠料金所 → 夢見が丘 → 田の谷峠料金所 | 860円 |
| 2. 田の谷峠料金所 → 夢見が丘 → 山頂 → 延暦寺(東塔) → 田の谷峠料金所 | 1,700円 |
| 3. 田の谷峠料金所 → 夢見が丘 → 山頂 → 延暦寺(東塔・西塔・横川) → 田の谷峠料金所 | 3,270円 |
| 4/5. 田の谷峠料金所 → 夢見が丘 → 延暦寺(東塔・西塔・横川) 及山頂 → 仰木料金所 | 2,430円 |
由「仰木料金所」出發的建議自駕路線如下：
| 自駕路線 | 收費 |
|---|---|
| 1. 仰木料金所 → 延暦寺(東塔・西塔・横川)及山頂 → 夢見が丘 → 田の谷峠料金所 | 2430円 |
| 2. 仰木料金所 → 延暦寺(西塔・横川) → 仰木料金所 | 1,570円 |
| 3. 仰木料金所 → 延暦寺(東塔・西塔・横川) → 山頂 → 仰木料金所 | 3,140円 |
| 4. 仰木料金所 → 延暦寺(東塔・西塔・横川) → 夢見が丘 → 仰木料金所 | 4,000円 |
| 5. 仰木料金所 → 延暦寺(東塔) → 山頂 → 延暦寺(西塔・横川) → 夢見が丘 → 田の谷峠料金所 | 2,430円 |
| 6. 仰木料金所 → 夢見が丘 → 延暦寺(東塔・西塔・横川) → 田の谷峠料金所 | 3,270円 |
3. 白髭神社
日本有三大知名水上鳥居：廣島、滋賀及茨城縣。其中滋賀縣水上鳥居就係位於白髭神社。不過，我哋都係先由本社講起啦！白髭神社係近江地區最古老嘅大社，而神社供奉猿田彦命，將萬事引導走往最好方向，所以好多信眾都會嚟祈求緣結、開運招福、學業成就、航海安全等等。
同本社一條馬路之隔，就係喺琵琶湖上嘅水上鳥居。紅色鳥居矗立喺清澈湖水之中，充滿神話色彩。鳥居前有一條可以到琵琶湖畔嘅階梯，係好多人必影嘅取景好地方。由於鳥居朝東，所以只睇到日出，睇唔到日落，但夕陽時份依然會有好靚嘅晚霞。
| 地址 | 滋賀県高島市鵜川215 |
|---|---|
| 營業時間 | 24小時 |
| 網站 | https://takashima-kanko.jp/spot/2018/06/post_89.html |
4. 雄琴溫泉，琵琶湖花街道
想感受大正浪漫嘅味道，建議一定要留宿「琵琶湖花街道」。呢間溫泉旅館位於山丘之上，可以一覽琵琶湖景色，仲可以享用源自雄琴溫泉嘅泉水。2019 重建之後，4樓成為附設露天溫泉浴池客房嘅專用樓層。
住客亦可以喺公眾大浴堂（設有露天風呂），或房間外租用私人浴池，盡情享受溫泉之樂。會席料理使用高級和牛「近江牛」、琵琶湖鮮魚等食材，味道一流，外觀亦好 IGable。網上有唔少 Package 選擇，可以一次過試晒特級近江牛、炙燒、手握壽司同水晶碟燒！旅館注重每個細節，務求令每位住客都能夠盡情放鬆。
琵琶湖花街道一泊二食套餐HK$1,785起，即睇更多「琵琶湖花街道」溫泉酒店住宿詳情。
| 地址 | 琵琶湖花街道滋賀縣大津市雄琴1丁目1-3，520-0101 |
|---|---|
| 網站 | https://www.hanakaido.co.jp/cn/ |
| 預訂 | https://agoda.tp.st/rZr2JBih |
第二日
1. 山王總本宮日吉大社
日吉大社係日本全國各地3,800多個『山王神』嘅總本宮。建於2100年前嘅日吉大社，據講喺除厄消災方面特別靈驗。
大社分為東本宮和西本宮兩個區域，寺院境內有近40個供奉著各種各樣神明的神社。東本宮同西本宮嘅正殿都係被稱為「日吉造」嘅特殊建築樣式，並且被指定為國寶。日吉大社每月都會舉辦各種各樣慶典活動，其中最出名係祈求天下太平、五穀豐登嘅「山王祭」，由每年3月第一個星期日開始，到4月14日為止，持續近個半月時間。
另外，值得一提嘅係，日吉大社境內種植咗約3000株楓樹，係關西地區首屈一指嘅人氣賞楓及紅葉景點。
| 地址 | 郵遞區號520-0113 滋賀縣大津市坂本5-1-1 |
|---|---|
| 營業時間 | 9：00～16：30 |
| 網站 | http://hiyoshitaisha.jp/ |
2. 琵琶湖大橋
由於琵琶湖地理位置係連接東西嘅交通要地，自古以來就係文明開化之地。咁喺琵琶湖兩岸要如何往來？就係靠宏偉嘅靠琵琶湖大橋！琵琶湖大橋全長約1400米，連繫湖西大津市及湖東的守山市。橋兩邊有行人路同單車路，可供民眾通行。
| 地址 | 郵遞區號520-0113 滋賀縣大津市坂本5-1-1 |
|---|---|
| 營業時間 | 24小時 |
| 網站 | https://www.bindan.jp/detail/spot/1261.html |
3. 佐川美術館
滋賀有超多超然美景，連美術館亦有同自然景色契合。佐川美術館四周被一個水庭圍繞，就好似喺水上飄浮，淡雅而充滿禪意。館內珍藏日本美術界的三位巨匠作品，包括以日本畫為主軸嘅「平山郁夫館」、銅像展「佐藤忠良館」，以及展示樂燒茶碗、陶藝嘅「樂吉左衛門館」。
佐川美術館喺日本茶道愛好者之間相當有名氣，附設於樂吉左衛門館嘅茶室更係令人驚艷，茶室設有一個浸沒於水中嘅小房間，以及一個浮喺水面上嘅大廳，空間非常夢幻。需要注意，茶屋只限預約參觀。
入場要先預約，可到以下網址登記預約。
| 地址 | 郵遞區號524-0102 滋賀縣守山市水保町北川2891 |
|---|---|
| 營業時間 | 9:30am – 5pm |
| 網站 | https://www.sagawa-artmuseum.or.jp/zh_tw/ |
4. 三井滋賀龍王 Mitsui Outlet Park
滋賀龍王係日本關西地區最大規模Outlet，由國際品牌、日本必買貨品到當地土產都買到！好多受香港人追捧嘅日系品牌喺呢度幾乎都有設櫃，可以喺度喪買。唔單止款式齊，而且仲抵買，返到香港嘅標價好大可能後悔自己點解無買多幾件。
除咗多商店，三井滋賀龍王仲以「與自然共生的 Outlet」為概念，整個設施都被大自然所環繞。代表性商店包括：Coach、Armani、Beams、United Arrows、Sekio、Adidas、Nike等。Outlet 入面仲有得食近江牛！
下載 MITSUI OUTLET PARK 滋賀龍王店鋪指南
| 地址 | 滋賀縣蒲生郡龍王町大字藥師字砂山1178-694 |
|---|---|
| 營業時間 | 10am – 8pm |
| 網站 | https://mitsui-shopping-park.com/mop/shiga/tw/ |
5. 大津市
住宿方面，都會建議大家住返喺大津。大津雖然唔多知名連鎖酒店，但大多地方都住得舒適，當地特色嘅酒店、旅館能夠讓你體會到賓至如歸嘅感覺，有一種身心都被療癒嘅感覺。
更多大津市旅遊指南：https://otsu.or.jp/zh-TW/aboutotsu
6. MEGA唐吉訶德大津店
雖然香港嘅DON DON DONKI愈開愈多，但喺鄉下行唐吉始終係兩回事，特別係識行一定係行MEGA。呢間大津店只可以用「好_大」、「好_ _大」同「好_ _ _大」形容。因為揸車去到，所以掃貨好方便，而且開到凌晨3點，建議深夜去行最好feel！
| 地址 | 大津市柳崎2-5 |
|---|---|
| 營業時間 | 9am – 3am |
| 網站 | https://tw.biwako-visitors.jp/spot/detail/2392?active=shopping |
第三日
1. Kanefuku Mentai Park Biwako 大洗明太子主題公園
以辣味嘅鱈魚卵製成明太子，係日本料理常見食材。明太子老舖「KANEFUKU」為咗將呢份熱情分享，開設咗日本首個明太子主題樂園兼教育中心。園區內嘅明太子生產工廠，產量高時可以日產5噸以上明太子。樂園有各種互動遊戲設施，遊客亦可以參觀各種明太子產品嘅生產過程，喺美食街品嚐明太子美食，遊覽明太子博物館。
滋賀大洗明太子主題公園入場免費，仲設有800個免費停車場泊位。一家大細過嚟滋賀路過的話，不妨入場參觀。
| 地址 | 滋賀県野洲市吉川4187 |
|---|---|
| 營業時間 | 9am – 6pm |
| 網站 | https://mentai-park.com/biwako/ |
2. 八幡山城跡
位於滋賀縣著名景點「八幡山」嘅「八幡山城」係豐臣秀吉為自己姪仔「豐臣秀次」興建嘅居城，呢座八幡山城喺豐臣秀次失勢後就被拆毀隨之廢城。廢城後，八幡一地因為具有水利之便，直至江戶時代依舊非常繁華，保存落嚟嘅水堀同倉庫至今仍吸引眾多遊客前往。八幡山城曾經入選「續100名城」，十分值得一睇。
3. 彥根城
登登登櫈，重點來了！
2017年NHK大河劇《女城主直虎》，講述戰國名家井伊氏嘅一段故事，主角最後化解重重危機，扶持井伊直政成為德川家康旗下重要武將，喺關原之戰後井伊家就喺彥根地區落地生根，興建「彥根城」作為代代相傳嘅居城。
彥根城完整保留江戶時代以前嘅築城方式，已被列入日本國寶城之一，亦係僅存嘅四座木造城堡之一。呢度除咗有豐富自然景觀，亦保存咗江戶時代嘅街道風貌同建築，有住濃厚歷史同文化風情，令人好似走咗入時光隧道一樣。
| 地址 | 郵遞區號522-0061 滋賀縣彥根市金龜町1-1 |
|---|---|
| 營業時間 | 8:30am – 5pm |
| 網站 | https://visit.hikoneshi.com/tw/ |
歡樂嘅時光過得特別快，玩咗3日，係時候揸車返京都/大阪喇！ 大家有冇諗過， 距離京都10分鐘車程嘅滋賀縣可以咁靚同咁多野玩？希望大家鍾意 Kilowatt 小隊為大家發掘嘅滋賀自駕遊行程，祝大家玩得開心！
小編推介京都精選酒店
五星奢華親子住宿酒店推介名單
文章最後更新：
