深中通道開通！中山四大好去處！深中一日遊有乜好玩？

自從深中通道開咗之後，我諗好多人都心郁郁想去一下中山，睇下究竟中山究竟有咩玩架啦，唔講咁多，即刻去片！

咁首先我地由深圳灣口岸出發，搭深港榮利嘅直通巴去中山，來回都係160蚊人仔姐，，大概1個鐘就到中山嘅核心地帶——國際酒店架啦！咁睇下個地圖就知啦，步行距離就可以去到我地今日會去嘅著名景點

不過落車之後我地就好肚餓，先去咗第一站——來龍酒樓醫下肚先！咁來龍酒樓呢，係一個中山本地嘅朋友介紹嘅，咁睇下就知啦，成個來龍酒樓係好大，而且都係坐滿曬人嘅～

到坐低飲茶啦，唔講唔知，原來來龍酒樓最出名嘅就唔係啲咩點心小菜，而係佢嘅荔枝紅茶，佢嘅茶係好香，又有少少甘甜嘅味道～同平時我地飲嘅普洱、壽眉係完全唔同嘅，荔枝紅茶係好有特色，有一種一試難忘嘅感覺，真係推介大家去試下！

咁到點心同小菜啦，佢嘅點心同樣係好好食，睇下我個叉燒包就知啦，係好鬆軟嘅；佢嘅粥亦都好有鑊氣，完全唔係落味精嘅味道，食落感覺係好養胃、好健康嘅味道～

咁食完野之後，係來龍酒樓隔離呢，就係號稱中山最高級嘅商場——萬象匯啦！咁中山嘅萬象匯又有咩咁特別呢，佢嘅鋪頭特別大之外呢，行人嘅空間係更加寬闊嘅～喺深圳又或者香港行商場好多時都要左穿右插，行商場都行得特別攰，而中山嘅萬象匯即使多人，都依然有好多空間，呢一個設計真係值得一讚！

到第三站我地就去到中山最出名嘅景點，孫文西路文化旅遊步行街啦！咁沿著呢條步行街，途中會有好多特色小店，同埋可以欣賞到佢獨特嘅建築，可以盡情打卡同影相～咁繼續行落去呢，就會有香山商業文化博物館、西山寺、中山市博物館，同孫中山纪念堂公園嘅，全部都係中山嘅著名景點！

咁行到咁上下就差唔多到夜晚啦，我地就去咗CoCo City度行街同食野啦！咁深圳嘅CoCo Park就聽得多，原來中山嘅CoCo City同樣有好多野玩！我地今日就遇到廣東省街舞聯賽。。。試咗一下珠瓏入水糖水鋪，嗌咗一個雞蛋仔，咁好老實講，食落係比香港街邊嘅雞蛋仔好食嘅，真係做到外脆內軟，仲要即叫即做，真係想話唔好食都幾難！

咁到最後呢，我地行咗一行入面嘅文青書店就返香港啦！呢一個中山一日遊之旅最特別就真係個來龍酒樓啦，真係本地人先知嘅地方！如果你想睇到更多大灣區城市本地捐O捐罅嘅好地方，就要記得訂閱我地嘅YouTube Channel同留意我地Trip Trip Go 處處行嘅網站啦，幫您揾到至荀酒店優惠～記得唔好錯過啦！